المصري هو اللى

المصـري هـوّ اللـي

لو عمل حاجة حلوة يبعت لجاره طبق يدوقه
وهو اللي

لو لقى الدنيا بتشتّي يجري يخبّط عليك يقولك لمّ الغسيل
وهو اللي

لو شم عندك حاجة بتتحرق يجري يطمن عليك لا تكون اتخنقت
وهو اللي

لو سمع صوت زعيق وخناق عندك يجي يصلح
وهو اللي

لو لقى خناقة في الشارع يقف يحوش مش بس يتفرّج‎
وهو اللي

لو لقى حد بيغرق يجري ينط في الميه حتى لو هيغرق معاه
وهو اللي

لو اتفرط منك كيس الجوافة في الشارع يقف يلمّ معاك

**********

المصري هو اللي

لو حس انك مزنوق يعملك جمعية مخصوص و يقبّضك الأول
و هو اللي

يقف معاك في الأحزان و الأفراح زي مايكون من بقية اهلك
و هو اللي

يلمّلك من الركاب فلوس لو مرتبك اتسرق منك في الأتوبيس رغم انه مايعرفكش
و هو اللي

لو لقاك في مواصلة و كان عارفك يحلف ميت يمين ليدفعلك الأجرة
حتى لو مافيش في جيبه غير نص جنيه

**********

المصري هو اللي يقعد معاك ع الفطار في رمضان
المصري اللي يشتري بالونات لولادك في العيد
المصري اللي يقف جنبك وانت بتدبح الاضحية
المصري اللي يباركلك لما ابنك يجيب مجموع ويساعدك يجيبله شغلانة
المصري اللي ييجي يقولك تجيب كشاكيل و أقلام بالجملة عشان توفر المصاريف

**********
طيبة المصري مش ممكن تلاقي زيّها فى اي بلد تانية

ياااااااااه اد ايه كلامك مؤثر بس حاسس اني مسمعتوش من زمان اوي او انه انقرض بس اكيد لسه موجود بلاش نقول انقرض عشان منئولش علي الدنيا السلام

الي الامام ان شاء الله في المواضيع الثقافيه المتميزه دي وتقبلي مروري

محمود عبده

مرسي اوي يا محمود على مرورك

والكلام ده موجود والله

بس مش في كل حته

بـــــــــــــازليا

السلام عليكم
كلمات جميلة واللة
بس اعتقد نها بتنتهى وحدة وحدة من بداية جلنا
لان المصرى بردك بيفتقر وحدة وحدة
بس ارجع وقول كلمات جميلة
الامضاء
شب من الطبقة الفقيرة

» احتويني اقتل البرد اللى فينى